Områdetakst

På heimesida til Statsforvaltaren kan du sjå status for områdetakst i din kommune (link)

Statsforvaltaren tek initiativ til oppstart i kommunen. I kvart takstprosjekt vert det oppretta eit takstutval. Eit takstutval består av lokale skogeigarar. Takstutvalet bestemmer innhald i prosjektet og lagar avtale med eit takstselskap på vegne av alle skogeigarane i kommunen eller i eit prosjektområde.

For å kunne produsere ein skogbruksplan må skogen fyrst takserast. Dette vert gjort i to steg. Fyrst gjerast ein fototakst der skogen vert inndelt i bestand. Eit bestand er eit område i skogen der alle tre er nokolunde like i alder og høgde.

Det finst mange ulike data som kan gi mykje informasjon i fototaksten: Flyfoto har gode bilete av skogen, laserdata gir høgde på trea, og satellittbilete kan brukast til å vurdere kor mykje tømmer det står i skogen.

Etter fototaksten kjem felttaksten der fagfolk vurderer skogen i felt og gjer miljøregistreringar. Ein fagperson vil då komme med tilrådingar til kva du kan eller bør gjere i skogen dei neste 10–15 åra. Det blir òg vurdert kvar tid det er mest økonomisk fornuftig å avverke skogen. Dette er viktig å vite når du skal vurdere eit tilbod om hogst.

Alle skogdata og registreringar leggjast i ein stor database. Frå databasen kan det hentast ut informasjon til skogbruksplanane.

Det er vanleg å registrere følgjande for kvart bestand:

Alder	Kor gamal er skogen i kvart bestand?
Treslag	Kva treslag veks kvar?
Volum	Kor mykje tømmer står det i min skog?
Tilvekst	Kor mykje meir tømmer kjem det i skogen kvart år?
Produksjonsevne/bonitet	Kor god er jorda mi for skogproduksjon?
Areal	Kor mykje gamal skog har eg, og kor mykje areal med god produksjonsevne har eg?
Miljøregistreringar i skog (MiS)	Kvar er det viktige livsmiljø eg må ta vare på?
Fleirbruksomsyn	Er det andre omsyn eg må ta i skogdrifta?
Hogstmodnadsalder	Når er skogen klar for hogst?
Behandlingsforslag	Er det trong for planting, suppleringsplanting eller ungskogpleie?
Sunnheit	Er det vindfall, tørkeskadar, hjorteskader m.m.?